1991 წლის 18 ივნისს სოხუმში მდებარე ფეხსაცმლის ფაბრიკაში ჩატარდა ყველა იმ მსხვილი სამრეწველო და სატრანსპორტო შრომითი კოლექტივის კრება, რომლებიც “მაიაკში” იყვნენ განლაგებული. კრების მონაწილეებმა გააპროტესტეს აფხაზეთის უზენაესი საბჭოს თავმჯდომარის, ვლადისლავ არძინბას გადაწყვეტილება, ხელი მოეწერა საკავშირო ხელშეკრულებას, რომელიც ეწინააღმდეგება სსრკ, საქართველოს და აფხაზეთის კონსტიტუციებს. 

მშრომელები მიიჩნევდნენ, რომ აფხაზეთის ხელმძღვანელებს არ ჰქონდათ უფლება, აფხაზეთის მოსახლეობის უმრავლესობის სახელით ელაპარაკათ, რადგან ავტონომიური რესპუბლიკის ამომრჩეველთა 62 პროცენტმა მიიღო მონაწილეობა 1991 წლის 31 მარტის რეფერენდუმში და უმრავლესობამ საქართველოს დამოუკიდებლობას მისცა ხმა. 

მშრომელებმა შეიმუშავეს მიმართვა გორბაჩოვისა და არძინბასადმი. ასევე, განაცხადეს, რომ საკავშირო ხელშეკრულებაზე ხელმოწერის შემთხვევაში სამოქალაქო დაუმორჩილებლობას გამოაცხადებენ.