1996 წლის 9 იანვარს ზუგდიდში გაიმართა მრავალათასიანი მიტინგი, რაც მოჰყვა “აფხაზი ბოევიკების მიერ” გალის რაიონის სოფელ შეშელეთში სანაიების ოჯახის 6 წევრის მკვლელობას.  გამომსვლელებმა აღნიშნეს, რომ არც რუსეთის სამშვიდობო ძალები და არც გაეროს დამკვირვებლები თავის მოვალეობას არ ასრულებენ. მიტინგმა მიიღო საქართველოს პრეზიდენტის, ედუარდ შევარდნაძისადმი მიმართვა, რომელშიც ითხოვენ აფხაზეთის პრობლემის პოლიტიკური მეთოდებით დაუყოვნებლივ მოგვარებას. თბილისის მიერ კონტროლირებული აფხაზეთის ავტონომიური რესპუბლიკის ადამიანის უფლებათა დაცვისა და ეროვნებათაშორისი ურთიერთობების კომიტეტი გალის რაიონში მკვლელობას ქართველი მოსახლეობის გენოციდად და სამშვიდობო პროცესის ჩაშლად მიიჩნევდა.

ამ აქციის გაგრძელება იყო მეორე დღეს, 10 იანვარს რუსეთის საელჩოს წინ დევნილების (იმდროინდელი პრესა ლტოლვილებს უწოდებს) საპროტესტო აქცია. აქციის მონაწილეებმა საელჩოს წარმომადგენლებს გადასცეს განცხადება, რომელშიც რუსეთის მხარე კონფლიქტის მოწესრიგების პროცესის შეგნებულად გაჭიანურებასა და “ორმხრივ თამაშში” ამხილეს.